RESOLUCIÓN DA 29ª EDICIÓN DO PROGRAMA DE BOLSAS DE POSGRAO NO ESTRANXEIRO 2018

A Coruña, 25 de abril, 2018.- A Fundación Barrié fixo pública hoxe a resolución da súa 29º edición do Programa de Bolsas de Posgrao no Estranxeiro para a realización de estudos Máster en centros académicos de todo o mundo, nun amplo abano de especialidades de interese e impacto para Galicia. A entrega de credenciais aos 10 novos bolseiros, universitarios galegos ou vinculados con Galicia, terá lugar o 29 de xuño na Fundación Barrié na Coruña.

As convocatorias anuais de Bolsas de Posgrao no Estranxeiro son un Programa de referencia da Fundación Barrié, que alcanza a súa 29ª convocatoria coa concesión de 684 bolsas desde 1990 e cun investimento acumulado de máis de 40 millóns de euros. O Programa reflicte o compromiso da Fundación Barrié pola educación e capacitación do activo máis valioso de Galicia: as persoas.

Lanzado en 1990, o Programa persegue un triplo obxectivo:

• facilitar o acceso ao coñecemento das mellores técnicas, métodos e procedementos;
• proporcionar experiencias vitais nun contorno internacional e multicultural;
• e contribuír ao desenvolvemento de vínculos académicos, sociais, profesionais e culturais de titulados universitarios vinculados a Galicia.

O Programa de Bolsas de Posgrao no Estranxeiro da Fundación Barrié, dirixido a graduados universitarios, licenciados ou titulados superiores, é un dos Programas de Bolsas de Excelencia máis destacado a nivel nacional e internacional.

10 bolsas para a realización de estudos de Máster

Na convocatoria de 2018 concedéronse bolsas a candidatos das seguintes áreas do coñecemento: as ciencias da vida, médicas e da saúde (3), as ciencias sociais (3), a enxeñaría e tecnoloxía (2) e as ciencias experimentais (2). A media académica dos estudos de grao dos bolseiros é 8,45 sobre 10.

3 dos novos bolseiros cursaron a súa licenciatura na Universidade de Santiago, 1 na de Vigo e o resto en universidades de fóra da comunidade galega (Politécnica de Madrid, Pontificia de Comillas, Politécnica de Cataluña). Entre as áreas de especialización encóntranse, dereito, enxeñaría (da enerxía, industrial, informática), biotecnoloxía, matemáticas, física, medicina, ADE.

Os países de destino onde cursarán os seus estudos de mestrado son: Reino Unido (6), Países Baixos (1), Suecia (2), Francia e Singapur (1). Realizarán os seus estudos en centros de referencia como a London Business School, University ou Oxford, University of Cambridge, London School of Economics and Political Science, University of Gothenburg, Technical University of Denmark, Radboud University Nijmegen, The Imperial College of Science, Technology and Medicine e Insead.

A media de idade dos bolseiros nesta convocatoria é de 24,1 anos sendo o 50% mulleres e o 50% homes. Con respecto á procedencia, a promoción do ano 2018 comprende a 9 bolseiros nados en Galicia – A Coruña (5), Pontevedra (2), Lugo (1) e Ourense (1) e 1 bolseira nada fóra de Galicia, sendo filla de galegos.
 
A REDE DE TALENTO DA FUNDACIÓN: A ASOCIACIÓN DE BOLSEIROS

A Fundación Barrié conta cunha activa Asociación de Bolseiros, creada en 1996, que ten preto dun milleiro de integrantes, todos beneficiarios dos programas de bolsas para investigación, estudos universitarios ou ampliación de estudos universitarios en España ou no estranxeiro. A Asociación desenvolve actividades encamiñadas a facilitar aos seus asociados o contacto con institucións profesionais e académicas de ámbito galego, nacional e internacional e sempre a manter e alimentar o vínculo da Fundación cos seus bolseiros.

Neste sentido, serve de vehículo para canalizar as actividades daqueles bolseiros que queran pór ao servizo de Galicia e, en particular, da Fundación, os seus coñecementos e experiencia, para que a formación adquirida durante o transcurso dos seus estudos e investigacións trascenda o ámbito da mellora persoal e reverta no avance da sociedade galega.

BOLSEIROS DE MÁSTER 2018
Nome	Universidade de orixe	Titulación a obter	Centro prioridade / País
Daviña Núñez, Carlos	Universidade Politécnica de Madrid	Máster en Bioquímica, Bioloxía Molecular e Biomedicina	Radboud University Nijmegen. Países Bajos
Varela Rozados, Iván	Universidade Politécnica de Madrid	Máster en Administración e Dirección de Empresas (MBA)	London Business School. Reino Unido
Jorge Díaz, Carmen	Universidade de Santiago de Compostela	Máster en Física Teórica	University of Cambridge. Reino Unido
Tojeiro Fernández, Ana	Universidade Pontificia Comillas	Máster en Administración e Dirección de Empresas (MBA)	Insead. Francia
Espinós Estévez, Carla	Universidade Politécnica de Valencia	Máster en Inmunoloxía	The Imperial College of Science, Technology and Medicine. Reino Unido
Pereira Arias, Emma	Universidade de Santiago de Compostela	Máster en Saúde Global	London School of Economics and Political Science. Reino Unido
Virgós Varela, Tirso	Universidade Carlos III de Madrid	Máster en Ciencias Políticas	University of Oxford. Reino Unido
García Ling, Carlos	Universidade Politécnica de Cataluña	Máster en Matemática Aplicada e Computacional	KTH Royal Institute of Technology. Suecia
Soutullo Sobral, Samuel	Universidade de Santiago de Compostela	Máster en Enxeñaría Informática	University of Gothenburg. Suecia
Nóvoa Martínez, Andrea	Universidade de Vigo	Máster en Tecnoloxías da Enerxía	University of Cambridge. Reino Unido