Colección de Arte Contemporánea

A colección de arte contemporánea internacional da Fundación Barrié, iniciada en 2008, construíuse no marco do seu tradicional apoio ás Artes desde diversos ámbitos, defendendo que a pintura é unha idea e unha forma de pensar, en moitos casos, sobre a propia pintura, obrigándonos a reflexionar e repensar de xeito continuo o seu lugar, así como o porqué e o cómo seguir a pintar.

A exposición amosa unha coidada selección dalgunhas das obras máis representativas da colección como Aiinaa do minimalista alemán Imi Knoebel; The history of wealth do estadounidense Jonathan Lasker; Look!! Look!! Look!! da artista británica Fiona Rae, compoñente da exposición Sensation comisariada por Damien Hirst en Saatchi; Panorama pink flamingos do francés Jean-Marc Bustamante; Llanos do británico Jason Martin, considerado herdeiro do Action Painting e de artistas como Jackson Pollock; Sen título de Yves Oppenheim baseada na tradición abstracta de Léger ou Delaunay; And it feels like love da estadounidense Shinique Smith ou Loose Fit de Ángela de la Cruz, a artista coruñesa máis contemporánea e finalista do Premio Turner en 2010, por mencionar algúns.