A FUNDACIÓN BARRIÉ E A ASOCIACIÓN ARELA PRESENTAN NOVOS OBRADOIROS DE KTORCE-18

A Coruña, 7 de setembro de 2021.- Ktorce-18 é unha iniciativa da Fundación Barrié e a Asociación Arela desenvolvida a nivel autonómico desde o ano 2012. Ten como fin achegar a Lei do Menor á comunidade educativa (pais, alumnos e profesores). Até o de agora chegou a máis de 35.000 participantes a través das 743 charlas impartidas.
Coincidindo co comezo deste novo curso escolar, o programa ofrece dous novos obradoiros sobre a prevención de condutas infractoras e sobre o acoso escolar-bullying, que se impartirán en formato aula, a través de dinámicas participativas nas que se procurará a máxima interacción co alumnado.
Con eles preténdese concienciar sobre as posibilidades delituosas nas actividades cotiás; dar a coñecer posibles situacións de risco con respecto a actos feitos sen pensar; sensibilizar a sociedade sobre a Lei do Menor; sensibilizar fronte ao problema do acoso escolar; axudar o alumnado para frear posibles casos de acoso escolar na aula e fornecer ferramentas á comunidade educativa para traballar na prevención do acoso escolar.
As prazas están limitadas a 60 obradoiros (25 na Coruña, 25 en Pontevedra, 5 en Lugo e 5 en Ourense). Respectarase a orde de inscrición e cada centro educativo poderá solicitar un máximo de 2 obradoiros.
 
O OBRADOIRO DE PREVENCIÓN DE CONDUTAS INFRACTORAS ten como obxectivo sensibilizar fronte ao problema do acoso escolar e previr este tipo de condutas, axudar o alumnado para frear posibles casos e fornecer ferramentas á comunidade educativa para traballar na súa prevención. Propiciarase o diálogo co alumnado acerca das súas actividades diarias, buscando aquelas que poidan dar entrada a cada delito, e introduciranse temas de interese como as redes sociais, para, ademais de afondar nos distintos delitos, explicar as diferentes medidas de seguridade.
Este obradoiro vai dirixido ao alumnado de 2º a 4º da ESO e de formación profesional básica de centros educativos de Galicia.
 
O OBRADOIRO DE ACOSO ESCOLAR-BULLYING ten como obxectivo sensibilizar fronte ao problema do acoso escolar e previr este tipo de condutas, axudar o alumnado a frear posibles casos e fornecer ferramentas á comunidade educativa para traballar na súa prevención. Mediante vídeos e distintas dinámicas, busca reflexionar sobre o impacto das nosas palabras nos demais, as características que teñen un agresor e unha vítima e debater sobre a existencia do bullying, o papel dos espectadores e introducir os delitos que se poden producir con este tipo de comportamentos.
Este obradoiro vai dirixido ao alumnado de 1º a 4º da ESO e de formación profesional básica de centros educativos de Galicia.
 
Ambos os dous obradoiros terán unha duración total de 100 minutos e desenvolveranse ao longo do curso escolar 2021-2022.
Os centros educativos interesados en participar poden preinscribirse enviando un correo electrónico a ana@arela.org ou chamando ao teléfono 986 212 537.
O prazo de preinscrición permanecerá aberto desde o 6 de setembro até cubrir as prazas.