Inicio / Sala de prensa / Summer Undergraduate Research Fellowship Program

Summer Undergraduate Research Fellowship Program

BUSCAR

FILTRAR

ÁREA
DATA

Multimedia

Memoria Anual 2022

Memoria corporativa e edicións anteriores

SUBSCRICIÓN AO NEWSLETTER

Reciba no seu correo toda a actualidade da Fundación Barrié

Subscribirse
CONTACTO DE PRENSA

Suzana Mihalic
Directora de Comunicación e Imaxe Corporativa


T. +34 981 060 091 / 659 459 030
smihalic@fbarrie.org

25-11-2020

A Fundación Barrié crea un novo programa de Bolsas de investigación internacional durante o verán para estudantes universitarios galegos

  • A Fundación Barrié crea el Summer Undergraduate Research Fellowship Program, un programa de bolsas de investigación internacional durante o verán, co obxectivo de que estudantes universitarios galegos poidan adquirir experiencia en institucións de referencia internacional, incrementar os seus coñecementos e orientar a súa carreira profesional.
  • A 1.ª edición está dirixida a estudantes galegos de 2.º e 3.º curso de titulacións universitarias en Ciencias da Vida para a realización de prácticas de investigación remuneradas no Departamento de Microbioloxía e Inmunoloxía do Louisiana State University Health Sciences Center (EE UU).
 

A Coruña, 25 de novembro de 2020: A Fundación Barrié crea o Summer Undergraduate Research Fellowship Program, un programa de bolsas para a realización de estancias de investigación internacional durante os meses de verán dirixido a estudantes universitarios galegos. Para o desenvolvemento das diferentes convocatorias deste programa, a Fundación Barrié conta co apoio dos seus antigos bolseiros que, como facilitadores, axudan a descubrir as oportunidades que se presentan nos diferentes ámbitos e nas mellores Universidades a escala internacional. Xa que logo, con este novo programa, a Fundación Barrié cumpre cun dobre obxectivo: ampliar o seu xa consolidado compromiso por promover a sociedade do coñecemento e contribuír ao desenvolvemento económico, social e cultural de Galicia, así como fomentar a implicación e o compromiso dos seus antigos bolseiros para que os seus coñecementos revertan en Galicia. 
 
 
1.ª CONVOCATORIA:
A primeira edición do Summer Undergraduate Research Fellowship Program é unha convocatoria conxunta da Fundación Barrié e o Departamento de Microbioloxía e Inmunoloxía do Louisiana State University Health Sciences Center, en Shreveport, Estados Unidos (www.lsuhs.edu/). Nos seus laboratorios ofreceranse prácticas remuneradas durante dous meses para estudantes galegos de titulacións universitarias en Ciencias da Vida. O obxectivo específico desta primeira convocatoria é achegarlles a investigación biomédica a universitarios galegos de segundo e terceiro curso para que poidan adquirir experiencia nun laboratorio competitivo e orientar a súa carreira profesional.
 

É un pracer establecer esta colaboración coa Fundación Barrié e acoller estudantes universitarios galegos na nosa Universidade. Esperamos que este programa lles axude a adquirir experiencia en diferentes eidos da Microbioloxía e a Inmunoloxía ademais de formárense para falar en público. Estamos seguros de que este programa será un grande éxito e de que animará aos estudantes a integrarse nos nosos programas de doutoramento e de Medicina. Oxalá este sexa o principio dunha colaboración moi produtiva coa Fundación Barrié.

           Dr. Martin Sapp
Mingyu Ding Memorial Professor
Catedrático e Xefe de Departamento de Microbioloxía e Inmunoloxía
Director, Center for Molecular Tumor Virology Feist Weiller Cancer Center
LSU Health Sciences Center, Shreveport

  
Nesta convocatoria, a Fundación Barrié contou co apoio de Mónica Cartelle Gestal, bolseira da Fundación Barrié no 2008 para unha estancia posdoutoral no Centre of Biomolecular Sciences da University of Nottingham, Reino Unido, onde traballou na área do quorum sensing. Foi galardoada co prestixioso programa intra-europeo Marie Curie, ademais dunha bolsa Prometeo que lle permitiu ser investigadora principal en Ecuador. Tras traballar como Investigadora Posdoutoral no Departamento de Enfermidades Infecciosas de UGA,  University of Georgia, actualmente é profesora de Microbioloxía e Inmunoloxía no Louisiana State University Health Sciences Center, en Shreveport, Estados Unidos.
 

Hai moitos anos, cando a confianza en min mesma estaba esmorecendo, a Fundación Barrié confiou en min e proporcionoume unha bolsa para estudar na Nottingham University. Dende aquela o meu camiño levoume a distintas partes do mundo, cada vez máis lonxe da miña querida Galicia, da miña terra, da miña familia. Mais a Fundación Barrié sempre estivo aí, ao longo do meu camiño, apoiándome. Agora, de novo, apoiáronme nesta iniciativa para poder traer un pouco de Galicia aquí, a Shreveport, e poder darlles aos mozos galegos a oportunidade de gozar dunhas bolsas de verán que expandan as súas posibilidades e que lles abran portas para o seu futuro. Cando me convertín en bolseira da Barrié, pasei a formar parte dunha familia cuxo desexo é traer a Galicia coñecemento;  agora é a miña oportunidade de facelo mediante este programa de bolsas. O meu desexo é que este programa creza e lles proporcione aos mozos galegos unha perspectiva onde os seus horizontes sexan máis largacíos e as súas posibilidades o mundo.
 

Mónica Cartelle Gestal
Assistant Professor, LSU Health Sciences Center, Shreveport
Convocatoria 2008 Bolsas Posgrao no Estranxeiro

 
Os estudantes seleccionados nesta primeira convocatoria realizarán prácticas remuneradas de laboratorio na devandita Universidade durante 9 semanas, entre o 28 de xuño e o 27 de agosto de 2021. Durante a estancia, os estudantes terán a oportunidade de participar en seminarios, journal clubs e outras experiencias científicas para ampliar os seus coñecementos sobre microbioloxía e inmunoloxía. Ao final do programa, presentarán un póster cos resultados da súa investigación nunha reunión científica organizada pola universidade.
 
Esta convocatoria está dirixida a estudantes universitarios con nacionalidade española e vinculados a Galicia matriculados nunha universidade española no segundo ou terceiro curso de estudos conducentes á obtención dalgunha das seguintes titulacións oficiais: Bioloxía, Bioquímica, Biotecnoloxía, Xenética, Microbioloxía/Bioloxía Molecular, Medicina, Farmacia, Ciencias Biomédicas e Ciencias Veterinarias.
 
Entre outros conceptos, a dotación económica inclúe a remuneración, a viaxe de ida e volta a Shreveport, en Louisiana, seguro médico e unha axuda para gastos de manutención.

Prazo de presentación de solicitudes: 25 de novembro de 2020 – 25 de xaneiro de 2021

As bases completas e formularios de solicitude están dispoñibles en www.fundacionbarrie.org.  

RECURSOS DISPONIBLES

Imaxes