A Fundación Barrié e a editorial Assouline presentan o libro “Pórtico de la Gloria. Una Restauración”

A Coruña, 24 de xullo de 2021. O Proxecto de Conservación Preventiva e Restauración do Pórtico da Gloria, acometido entre os anos 2006 e 2018 pola Fundación Barrié e a Catedral de Santiago de Compostela, supuxo non só un considerable reto para as institucións promotoras, senón tamén un acontecemento de singular importancia no eido da historia da arte e da conservación artística dos últimos anos.
 
O proxecto, posible grazas ao mecenado exclusivo da Fundación Barrié, cun investimento de máis de seis millóns de euros, é o reflexo do seu compromiso coa recuperación do patrimonio histórico e cultural de Galicia.
 
Agora, a Fundación Barrié pon o ramo ao proxecto coa publicación de Pórtico de la Gloria. Una restauración. En 220 páxinas e 150 fotografías, o libro repasa os doce anos e as máis de 50.000 horas de traballo para recuperar o esplendor desta obra magna do século XII. As fotografías elixidas, moitas delas inéditas, son testemuño do dramático estado no que se atopaba a obra antes do inicio do proxecto; dos traballos de intervención realizados e os seus avances para, finalmente, presentar o magnífico resultado final. Unha serie de imaxes do “antes” e “despois” en páxinas enfrontadas permiten apreciar a beleza das esculturas esculpidas en pedra cos seus abundantes motivos decorativos e policromía conservada.
 
Esta xoia editorial, cuxa data de publicación coincide coa celebración do Ano Santo 2021, é tamén –en palabras de José María Arias, presidente da Fundación Barrié– unha homenaxe, no centenario do seu nacemento, a Carmela Arias, quen consagrou a súa vida a defender o legado do seu home, o noso fundador Pedro Barrié, e así llo dedicamos, porque estamos seguros de que a culminación, que non chegou a ver, dun proxecto no que ela puxo tanto empeño e que é tan coherente coa súa visión do progreso de Galicia, ao que se consagra a Fundación Barrié, é o tributo máis digno que puidésemos ofrecerlle.
 
Para a edición deste volume, a Fundación Barrié contou coa prestixiosa casa editorial Assouline, recoñecida internacionalmente pola elegancia e extraordinaria calidade das súas publicacións.
 
A edición de coleccionista, pertencente á serie “Legends” de Assouline, está limitada a 1.000 exemplares de gran formato, fabricados á man nun obradoiro de encadernación de Italia e presentados nun estoxo revestido de seda. As súas dimensións son de 35x28x4 centímetros e 3,55 quilos.
 
Co obxectivo de facer o libro accesible a un público máis amplo, a Fundación Barrié editou unha segunda edición, pertencente á serie “Icons” de Assouline, de menor formato. As súas dimensións son de 27x18,5x2 centímetros e 1,2 quilos.
 
O libro empeza cun prólogo escrito por Gaël de Guichen, membro do Comité Científico do Proxecto de Conservación Preventiva e Restauración do Pórtico da Gloria, quen tamén é asesor do Director Xeral de ICCROM (The International Centre for the Study of the Preservation and Restoration of Cultural Property). Deixando por un momento en suspenso a marabilla estética, calquera peregrino, visitante, profano ou entendido pregúntase como foi posible chegar a este resultado sen engadir nova pintura sobre a superficie do Pórtico, tal como lle aseguran os guías do monumento; tal como teiman os técnicos; tal como aseveran, en fin, os promotores, a Catedral de Santiago de Compostela e a Fundación Barrié. Este libro, entre outras cousas, quere dar conta destes misterios.
 
A Fundación Barrié e a súa aposta pola divulgación
Este libro segue ademais o ronsel doutras accións de divulgación emprendidas pola Fundación Barrié antes, durante e despois do Proxecto de Conservación Preventiva e Restauración do Pórtico da Gloria, como as visitas ás estadas, que permitiron a máis privilexiada visión da obra a todo o público interesado, e as exposicións internacionais, que pretendían concienciar a sociedade da importancia do Pórtico no contexto do románico, o primeiro movemento de arte internacional europeo. Rematado o proxecto, a Fundación Barrié quixo poñer ao dispor tanto dos visitantes da obra como daqueles aos que non lles sexa posible vela directamente unha visión detallada de todo o conseguido, a través dunha app descargable de balde en Apple Store e Google Play e que permite acceder a un Pórtico dixitalizado en resolución xigapíxel, acompañado por narrativas en forma de “storytelling” entre outros contidos. Este libro achega outra aproximación, a que permite unha impresión coidada a cargo dunha editorial de recoñecido prestixio dedicada á produción de volumes de exquisito acabado: libros que son alfaias como o é, dentro da arte universal, a obra que neste caso se presenta.