Axenda

IV Xornadas de fundraising para a promoción do mecenado universitario

A Fundación Barrié acolle, na súa sede de Vigo, as IV Xornadas de fundraising para a promoción do mecenado universitario organizadas pola Universidade de Vigo e o seu Consello Social. Nesta ocasión, as xornadas centraranse na análise das tendencias que posibilitan a introdución de instrumentos e canles innovadoras para o financiamento privado das universidades como son, por exemplo, as fórmulas de obra social, as doazóns e legados, ou o micromecenado cultural.

As universidades, no seu compromiso coa comunidade (a nivel local, nacional e internacional) ofrecen oportunidades singulares á filantropía para diferenciarse no financiamento específico de proxectos no contexto académico, con fins educativos, científicos e tamén creativos. Universidade é sinónimo de prácticas socialmente inclusivas. Nun afán constante por acadar o benestar xeral, as universidades aplican os principios de transparencia e legalidade en todas e cada unha das súas operacións económicas. Non obstante, a emerxencia de novos produtos e servizos para o mecenado en rede (ex.: o crowdfunding) propician que as universidades se doten de ferramentas innovadoras para a xestión eficiente de doazóns, legados e outros activos de natureza privada. Isto implica a promoción da marca pública universitaria e a participación directa do antigo alumnado na proxección social das universidades. O traballo conxunto de administradores, políticos e mecenas en proxectos de obra social universitaria pasa por unha reflexión previa sobre a influencia destas figuras na gobernanza interna da universidade. Que función ten o filántropo universitario? Como integralo nos consellos sociais? Durante día e medio, os participantes nestas xornadas coñecerán algúns casos de mecenado universitario internacional que van máis alá dos programas tradicionais de bolsas, legados, premios ou patrocinios. A filantropía actual está cambiando o modelo tradicional de universidade ao establecer un novo marco de relacións duradeiras entre académicos, axentes sociais e mecenas.

Obxectivos

• Coñecer as iniciativas que marcan as tendencias xerais de investimento privado nas universidades;
• Comparar modelos para a busca efectiva de mecenas potenciais en proxectos universitarios;
• Debater sobre a estrutura que permita nas universidades un financiamento privado e continuado de tipo estrutural;
• Identificar as canles que favorecen a xestión de proxectos tractores en I+D+i;
• Promover sinerxías para a xestión de programas de talento universitario que resulten sostibles. 

Público ao que vai dirixido

• Administrador/a xeral
• Consello social
• Creador/a de tendencias 
• Director/a de investigación
• Director/a de márketing
• Xerente/a
• Investidor/a

ETIQUETADO EN: MECENADO UNIVERSITARIO  ,  FUNDRAISING