Axenda

Exposición benéfica de ilustracións para visibilizar os TCA

A Fundación Barrié acolle na súa sede coruñesa “InvolucrARTE”, unha exposición benéfica de ilustracións realizadas por diferentes artistas, organizada pola Asociación de Bulimia e Anorexia da Coruña (ABAC).

A través desta iniciativa, a entidade sen ánimo de lucro quere visibilizar os trastornos da conduta alimentaria (TCA), en beneficio da saúde mental e física da sociedade. “Pretendemos informar a través da arte, co obxectivo de que esta sirva para concienciar e sensibilizar a cidadanía”, destaca Jorge Garnelo, responsable de comunicación de ABAC.

A exposición, que recollerá máis de vinte obras realizadas por distintos artistas, nacionais e internacionais, será de balde e poderá visitarse dende 27 ata 28 de febreiro no primeiro andar da Fundación Barrié. O público poderá acceder ambos días a “InvolucrARTE” tanto pola mañá (dende as 11.00 ata as 14.00 horas), como pola tarde (dende as 17.00 ata as 20.00 horas).

Ademais, as persoas que así o desexen poderán colaborar con esta causa poñéndose en contacto con ABAC, mediante calquera canle, para solicitaren máis información ao respecto. “Ogallá a xente se anime a apoiarnos para poder seguir a loitar contra os TCA con máis recursos”, sinala Garnelo.

ETIQUETADO EN: TCA  ,  BULIMIA  ,  ANOREXIA