Axenda

Conferencia: "O fantástico na cultura grecorromana"

Jacobo Ligozzi. Unha quimeira

Museo Nacional del Prado

Luis Alberto de Cuenca

Ciclo de conferencias: A arte fantástica 2018-2019 organizado pola Fundación Barrié e a Fundación Amigos do Museo do Prado.

Para calibrarmos a achega da cultura grecorromana ao universo do fantástico, resulta imperativo en primeiro lugar decidir que é o fantastique, termo acuñado por Todorov para designar un tipo de literatura que naceu cando se perderon os referentes mítico-relixiosos na sociedade occidental, ou sexa, no século XVIII. Non se pode falar, pois, estritamente de literatura fantástica ata despois da revolución industrial. Logo de referirse a esas letras fantásticas stricto sensu, citando os seus autores e obras máis notables, o conferenciante abordará algúns textos moi concretos que poderían servir de antecedentes á literatura fantástica propiamente dita no mundo clásico. Desde Homero ata Flegón de Trales, os antigos tamén se interesaron nese lugar intermedio entre o posible e o imposible representado polo fantástico, un lugar por onde transitaron con certa frecuencia os autores grecolatinos, malia que a súa cultura supuxo un adianto de moitos séculos á hora de optar polo logos no canto do mythos, como ocorrería máis tarde na Europa enciclopedista do Século das Luces. Así a todo, a lección que recibimos de calquera prospección que poidamos levar a cabo sobre o fantastique é que o mito vive agochado nas sociedades máis racionalistas e que é difícil, se non imposible, erradicar o misterio da órbita humana.

ETIQUETADO EN: CONFERENCIAS  ,  MUSEO DEL PRADO  ,  LUIS ALBERTO DE CUENCA  ,  FANTÁSTICO  ,  CULTURA GRECORROMANA